Áslaug Ólafsdóttir sendi eftirfarandi:

"Hélurifs er þekjuplanta sem ber blá/hélusvört ber og þekur beð með birkitrjám hjá okkur. Ég lagðist í tilraunaeldamennsku, týndi 2.5 kg af berjum og sultaði með tvennum hætti. A: sykurskert með sultuhleypi(blátt melatin), þar sem ekki er vitað um pectin innihald berjanna og B: kíló á móti kílói af sykri. A: kom vel út en óþarflega stíft og B: ágætis sulta hæfilega þykk svo greinilegt er að berin hafa í sér náttúrulegt pectin. Já, það er mörg matarholan!
Einnig eru nokkrar kirtilrifs plöntur hjá okkur í sama beði en þær bera rauð, steinalaus og ákaflega góð ber".

Á vef Lystigarðs Akureyrar er að finna frekari upplýsingar en þaðan er myndin fengin.

Grétar L Marinósson sendi þessa grein ásamt mynd til Berjavina. 

Fjórtán manna hópur fór í berjatínsluferð í Héðinsfjörð um síðustu helgi (14-16 ág). Gengið var frá Hóli sunnan Siglufjarðar þar sem bílar voru skildir eftir, yfir Hólsskarð og niður í Ámárdal. Þaðan var berja leitað norður Héðinsfjörð vestan Héðinsfjarðarvatns. Að tínslu lokinni var svo haldið samdægurs til baka um Hestskarð. Vikuna 5.-8. ág. hafði annar hópur m.a. kannað berjasprettu á svæðinu og komist að því að hún var geysimikil, aðallega aðalbláber (aðalber í munni Norðlendinga) og krækiber í Nesdal jafnt sem Héðinsfirði. Þetta var sannreynt í síðari ferðinni og tíndi hver maður allt að 5 lítrum á klst. Mikill munur var þó á lyngum og lautum, sum lyng og sumar lautir rírar eða lítt þroskaðar og aðrar, jafnvel á næsta leiti, fullþroskaðar og gáfu af sér allt að heilum lítra á 10 mín. Gaman væri að fá skýringu fróðra manna á þessum mun. En sem sagt Héðinsfjörður bíður tiltölulega ósnortinn af berjatínum og jafnvel fuglar eru fáir á ferli um þessar mundir. Því er hætt við því að mest af berjunum endi sem áburður nema berjaáhugamenn drífi sig fyrir frostnætur. Fljótlegast er að ganga yfir Hestskarð (2,5 klst), nema menn stelist í gegn um göngin!

Elín Stephensen, berjavinur á fésbókinni, sendi inn einfalda og góða uppskrift af morgunverðar-hræringi sem vert er að gefa gaum:

• 1 dl eplasafi (eða 1/4 úr epli og smávegis af köldu vatni)
• 100 g hreint skyr
• 1/2 banani
• 75 g frosin aðalbláber
• Svolítill biti af ferskri engiferrót

Útvarpsþátturinn Í boði náttúrunnar tók viðtal við Berjavini. Þátturinn er á dagskrá á Rás 1 eftir fjögurfréttir á laugardögum. Þessi þáttur var helgaður berjum, bæði þeim sem allir geta týnt í villtri náttúrunni og þeim sem vaxa á berjarunnum. Jón Guðmundsson garðyrkjufræðingur fór yfir nokkrar spennandi tegundir berjarunna sem hægt er að rækta í görðum og síðan heimsóttu þáttastjórnendur berjaáhugamennina Þorvald og Konráð Pálmasyni (sjá kynningu). Konráð hefur búið fjarri heimahögum í hart nær 25 ár en hann býr ásamt fjölskyldu sinni í Ástralíu.